Саха сайдам ыала

САХА САЙДАМ ЫАЛА

Бэс ыйын 21 күнүгэр Ураһалаах алааһыгар, Үрүҥ Тунах Ыһыаҕы көрсө, Саха Өрөспүүбүлүкэтигэр Үлэ сылын, Мэҥэ Хаҥалас улууһугар 2023-2025 сылларга биллэриллибит Тыа хаһаайыстыбатын сылларынан чэрчитинэн - улуустааҕы Саха сайдам ыала-2023 күрэх буолан ааста.

Улууспутуттан кэтэх хаһаайыстыбалаах биэс ыал кыттыыны ылла: Алтан нэһилиэгиттэн Майя Владимировна, Дмитрий Дмитриевич Билюкиннар, Мэҥэ нэһилиэгиттэн Яна Яковлевна, Айтал Борисович Васильевтар, Моорук нэһилиэгиттэн, Туйаара Николаевна, Роман Романович Егоровтар, Майа нэһилиэгиттэн Елизавета Спиридоновна, Герман Славич Неустроевтар, l Тыыллыма нэһилиэгиттэн Ирина Иннокентьевна, Николай Семенович Игнатьевтар дьиэ кэргэттэрэ.

Ыраахтан-чугастан мустан кэлбит, олох инники күөнүгэр сылдьар улууспут эдэр ыаллара хас да түһүмэҕинэн: быыстапкаҕа, дьиэ кэргэни билиһиннэриигэ, талааны көрдөрүүгэ, бириэмэҕэ ынах ыаһыҥҥа кыттан, сүрдээх көхтөөх, саҥа сонун, ураты сырдык эйгэлээх тэрээһин буолан ааста.

Бары да тыа сириттэн төрүттээх, өбүгэ төрүт дьарыгын умнубакка, утумнаахтык дьарыктанан, утум удьуору салҕыы сылдьар дьон, күрэхтэһии биир кэрэ-бэлиэ түһүмэҕэр - ынах ыырга ким да иҥнэн-толлон турбата. Аҕалар-уолаттар күрүөҕэ баайыллан турар сүөһүнү һайдаан-һаттаан сиэтэн аҕалбыттарын, ыал ийэлэрэ бэрт үөрүйэхтик ыан түргэн-тарҕан, ыраас туттууну көрдөрөн дьиҥнээх саха далбар хотуттара буолалларын туоһулаатылар.

Эдэр дьон бүтүн дьиэ кэргэнинэн тахсан илии-илиилэриттэн ылсан, бииргэ ыллаан эйээрэллэрэ, кыыстыын-уоллуун, ийэлиин-аҕалыын чэпчэкитик сиртэн тэйэн эрэрдии дьиэрэҥкэй тэбэн үҥкүүлээн битийэллэрэ мустубут дьону барыларын сүргэлэрин көтөхтө, санааларын үөртэ.

Куонкурус түмүгүнэн "Саха сайдам ыала-2023" кылаан кыайыылаахтарынан Алтан нэһилиэгиттэн Майя Владимировна, Дмитрий Дмитриевич Билюкиннар дьиэ кэргэн буоллулар, Марфа Моисеева салайааччы Алмазэргиэнбаан акционернай хампаанньа Аллараа Бэстээхтээҕи филиала туруорбут саха боруодалаах тыһаҕаһынан наҕараадаланнылар. Майа сэлиэнньэтэ тыа сирин түөлбэтин дьаһалтата 3 кууруссаны туттарда.

Саха сатабыллаах ыала анал аат хаһаайыттарынан Майа сэлиэнньэтэ Елизавета Спиридоновна, Герман Славич Неустроевтар буоллулар. Мэҥэ Хаҥалас улууһун дьаһалтата туруорбут ньирэйинэн наҕараадаланнылар. Ньирэйи Чүүйэ муниципальнай унитарнай тэрилтэ биэрдэ.

Саха аламаҕай ыала анал аат хаһаайыттарынан I-кы Тыыллыма нэһилиэгиттэн Ирина Иннокентьевна, Николай Семенович Игнатьевтар дьиэ кэргэттэрэ буоллулар. Мэҥэ Хаҥалас улууһун дьаһалтата туруорбут икки ыйдаах сибиинньэ оҕотунан наҕараадаланнылар. Сибиинньэни Егор Гоголев салайааччылаах Тирэх хаһаайыстыба биэрдэ.

Саха хоһуун ыала анал аат хаһаайыттарынан Мэҥэ нэһилиэгиттэн Яна Яковлевна, Айтал Борисович Васильевтар буоллулар, Майа сэлиэнньэтэ тыа сирин түөлбэтин дьаһалтата туруорбут үс куһунан наҕараадаланнылар.

Саха мааны ыала анал аат хаһаайыттарынан Моорук нэһилиэгиттэн, Туйаара Николаевна, Роман Романович Егоровтар дьиэ кэргэн буоллулар, "Майа сэлиэнньэтэ" тыа сирин түөлбэтин дьаһалтата туруорбут чоппускаларынан наҕараадаланнылар.

Дьон биһирэбилэ анал аат хаһаайыннарынан Моорук нэһилиэгиттэн Туйаара Николаевна, Роман Романович Егоровтар дьиэ кэргэн буоллулар, Мэҥэ Хаҥалас улууһун дьаһалтата туруорбут икки подсадной куһунан наҕараадаланнылар.

Кыттааччыларбыт бары өттүк харалаах, үөрэн-көтөн тарҕастылар. Кыттыыны ылбыт бары дьиэ кэргэттэрбитин истиҥник эҕэрдэлиибит, ситиһиилэри баҕарабыт!

Мэҥэ Хаҥалас улууһун дьаһалтатын пресс-сулууспата