САХА САЙДАМ ЫАЛА КҮӨН КҮРЭС ДЬОН-СЭРГЭ БИҺИРЭБИЛИН ЫЛЛА

«САХА САЙДАМ ЫАЛА» КҮӨН КҮРЭС ДЬОН-СЭРГЭ БИҺИРЭБИЛИН ЫЛЛА

Бэс ыйын 15 күнүгэр Ураһалаах алааһыгар улуустааҕы ыһыахпыт киин түһүлгэтигэр Арассыыйаҕа Дьиэ кэргэн, Саха Өрөспүүбүлүкэтигэр Оҕо саас, Мэҥэ Хаҥалас улууһугар Тыа хаһаайыстыбатын сылларыгар туһаайыллыбыт

«САХА САЙДАМ ЫАЛА 2024» улуустааҕы дьиэ кэргэттэр күрэхтэрэ ыытылынна.

Улуус баһылыга Дмитрий Тихонов, СӨ Бырабыыталыстыбатын бэрэссэдээтэлэ Кирилл Бычков улууспут үтүө үгэстэрдээх, саха сайдам ыалларын көрсөн эҕэрдэлээтилэр.

Нөөрүктээйиттэн Евдокия, Владимир Черкашиннары, Аллараа Бэстээхтэн Кристина, Константин Герасимовтар, Хара нэһилиэгиттэн Анна, Иван Петровтар,

1-кы Баатара нэһилиэгиттэн Саргылана, Николай Андреевтар, Майаттан Валентина, Рустам Кривошапкиннар оҕолорун, сиэннэрин кытта кыттыыны ыллылар.

Олоххо көхтөөх көрүүлээх, иллээх-эйэлээх дьиэ кэргэттэрбит бэйэни билиһиннэрии, ынах ыаһын, алаадьы астааһын, ыһыах мааны сандалытын көрүү, талааны, дьоҕуру көрдөрүү түһүмэхтэринэн бэйэлэрин көрдөрдүлэр.

Куонкуруска улуустааҕы социальнай бэлиитикэ салалтатын начаалынньыга Октябрина Кулешова,

«Алмаасэргиэнбаан» аахсыйалаах кэммиэрчискэй баан Аллараа Бэстээхтээҕи эбии салаатын салайааччыта, күрэх сүрүн спонсора Марфа Моисеева,

улуустааҕы тыа хаһаайыстыбатын салалтатын салайааччытын солбуйааччы Александр Борисов,

улуустааҕы бэтэринээрийэ салалтатын салайааччыта Саргылана Тополина,

Алтан нэһилиэгиттэн 2023 сылга ыытыллыбыт улуустааҕы  «Саха сайдам ыала 2023» кыайыылаахтара Майя уонна Дмитрий Билюкиннар

састааптаах дьүүллүүр сүбэ үлэлээтэ.

Куонкурус түмүгүнэн «Саха сайдам ыала‒2024» күөн күрэс кыайыылаахтарынан Майа сэлиэнньэтиттэн Валентина, Рустам Кривошапкиннар таҕыстылар, тыһаҕас бирииһи туттулар.

Иккис үрдэли Аллараа Бэстээхтэн Кристина, Константин Герасимовтар ыллылар,

үһүс үрдэл хаһаайыттарынан Хара нэһилиэгиттэн Анна, Иван Петровтар буоллулар, ньирэй бирииһинэн наҕараадаланнылар.

Нөөрүктээйи нэһилиэгиттэн Евдокия, Владимир Черкашиннар «Саха мааны ыала» анал аатынан ааттананнар атыырдаах тыһы подсадной кустары туттулар.

1-кы Баатараттан Саргылана, Николай Андреевтар «Саха сатабыллаах ыала» анал ааты ылан 10 бройлер чоппуусканан наҕараадаланнылар.

Бу курдук дьоһун мааны ыалларбытын, алаһа дьиэни араҥаччылыыр, аал уоту тыынныыр саха ыалларын чиэстиир, манылыыр күрэх үрдүк таһымҥа ыытылынна.

Мэҥэ Хаҥалас улууһун дьаһалтатын пресс-сулууспата