"Собо-2023"

Атырдьах ыйын 26-27 күннэригэр III Мэлдьэхси (Томтор) сиригэр-уотугар, Кумах Күөл сынньалаҥ-туристическай киинигэр сорсуннаах булчуттар ини-бии Егор уонна Сергей Никифоровтар сырдык ааттарыгар Собо-2023 аһаҕас, өрөспүүбүлүкэтээҕи күрэх буолан ааста. Сүрүн тэрийээччинэн уолаттар аҕалара сынньалаҥ киин салайааччыта - Валерий Никифоров турда.


Кыра самыырдаах да буоллар, үтүө сылаас сайыҥҥылыы күн ыраахтан-чугастан үгүс-дьон сэргэ муһуннна. Үөрүүлээх-быһыыга майгыга Валерий Никифоров уонна улуус спортивнай кэмитиэтин салайааччыта Иннокентий Баишев мустубут дьону эҕэрдэлээн, күрэхтэһиини арыйдылар.
Судьуйанан Төрүт үгэс федерация толороччу дириэктэрэ Дмитрий Сидоров үлэлэлээтэ.

Уопсайа 5 хамаанда кытынна. Кыттааччылар салгыы маннык көрүҥнэргэ илин-кэлин былдьастылар: бириэмэҕэ илим үтүүгэ уонна хомуйууга, тыынан устан киирэн эргиллии эстэпиэтэҕэ, илим үтэн баран сарсыныгар ким төһө элбэх собону туттарыытыгар, булт-алт эйгэтигэр викторинаҕа, хапсаҕайга, мас тардыһыытыгар, канат былдьаһыытыгар, итиэннэ ким элбэх собону сиэһиҥҥэ көхтөөх ыалдьааччылаах, уоттаах-төлөннөөх күрэстэр күлүмнэтэн аастылар.


I миэстэ Туску хамаанда (III Мэлдьэхси нэһилиэгэ) , биирдии бэйэлэрэ казанынан уонна булт маҕаһыыннарын туоһу суруктарынан наҕараадаланнылар.
II миэстэ Хоту хамаанда (III Мэлдьэхси нэһилиэгэ) булт маҕаһыыннарыттан туоһу суруктарынан наҕараадаланнылар.
III миэстэ Дьөһөгөй оҕото хамаанда булт маҕаһыыннарын туоһу суруктарынан наҕараадаланнылар.

Итиэннэ хапсаҕайга, мас тардыһыытыгар, кырдьаҕас уонна эдэр балыксыт аатыгар, түргэн-тарҕан туттууга, улахан собоҕо, саамай актыыбынай кыттааччыга уонна да атын кэрэхсэбиллээх номинацияларга кыттыбыт туох баар дьон-сэргэ тигистэ.

Аламаҕай асчыттар түүннэри-күннэри балаҕаҥҥа ас астаан түбүгүрдүлэр: ыһаарыламмыт, буспут собо, ыргыччы эмис эт миинэ, салаат, итии чэй, алаадьы, бэрэскии, сугун барыанньа уонна онтон да атын саха талбыт аһа барыта. Истиҥ, сылаас эйгэ манна үөскээтэ.

Бириистэри Никифоровтар дьиэ кэргэн, кинилэр чугас аймах-билэ дьоно III Мэлдьэхси нэһилиэгин олохтоохторо, улуус дьаһалтата, булт маҕаһыыннарын салайааччылара уонна урбаанньыттар туруордулар.


Анаабыт курдук икки күн табыллан туран биэрдилэр. Мустубут дьон сүргэлэрэ бэркэ көтөҕүллэн, биир тыынынан алтыһан куттара-сүрдэрэ бөҕөргөөн, дууһалыын сынньанан, инники олохторугар күүс-уох ылан тарҕастылар. Маннык тэрээһинтэн дьон санаата күүһүрэр. Сүр көтөҕөр - үтүө айылгылаах.

Эһиил өссө элбэх кыттааччы, ыалдьыт кэлиэ диэн тэрийээччилэр эрэл санааларын биллэрдилэр.


Мэҥэ Хаҥалас улууһун дьаһалтатын пресс-сулууспата