СҮРЭХТЭН СҮРЭХХЭ БЫРАЙЫАК 2-С НААХАРА НЭҺИЛИЭГЭР ТЭРИЛЛЭН ЫЫТЫЛЫННА

«СҮРЭХТЭН СҮРЭХХЭ» БЫРАЙЫАК 2-С НААХАРА НЭҺИЛИЭГЭР ТЭРИЛЛЭН ЫЫТЫЛЫННА

Бүгүн, алтынньы 18 күнүгэр, улууспут биир баай устуоруйалаах 2-с Наахара дьоһун сиригэр ыаллыы сытар 1-кы Наахара, Холгума нэһилиэктэриттэн Улуу Кыайыы 80 сылын көрсө ыытыллар “Сүрэхтэн сүрэххэ” социальнай бырайыак үрдүк таһымҥа ыытылынна.

Үөрүүлээх күн Урааҥхай саха үтүө үгэһинэн дойдубут, сирбит-уоппут иччилэриттэн, Үөһээ Айыылартан көрдөһөн, Сергей Зверев-Кыыл Уола тоҕус мэҥэ хамсаныыларын оҥорууттан, ыраастаныыттан саҕаланна.

Тэрээһин үөрүүлээх чааһыгар улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, нэһилиэк баһылыга Петр Никитин, улуус бэтэрээннэрин Сүбэтин бэрэссэдээтэлэ Евдокия Решетникова, улуустааҕы Ытык сүбэ салайааччыта Зиновий Игнатьев сэрии сылын оҕолорун, тыыл бэтэрээннэрин, аҕам саастаах дьоммутун бүгүҥҥү үөрүүлээх күнүнэн эҕэрдэ тылларын эттилэр.

Бу күн аҕам саастаах дьоммутугар сатабыллары сайыннарар “Пэчворк”, “Уҥкүүнэн терапия”, “Тарбаҕынан йога”, “Нейробика”, “Хомус” маастар-кылаастар, “Тыыл бэтэрээнигэр бэлэх” автодесант, психологическай тренинг, “Манчаары ыччаттара” этэрээт тыыл бэтэрээннэригэр көмө, Людмила Заровняева-Стручкова салайааччылаах Майатааҕы үһүс көлүөнэ оскуолата, нэһилиэк талааннаах дьоно эҕэрдэ кэнсиэрэ тэриллэн дууһалыын сынньанан, сүргэлэрэ көтөҕүллэн, ирэ-хоро кэпсэтэн тарҕастылар.

Тэрийэр бөлөх аатыттан нэһилиэккэ бырайыак анал эмбилиэмэлээх ыскамыайканы бэлэх ууннулар.

"Сүрэхтэн сүрэххэ" бырайыак аныгыс нэдиэлэҕэ Аллараа Бэстээх бөһүөлэгэр уонна сахалартан бастакы Сэбиэскэй Сойуус Дьоруойа Федор Кузьмич Попов дойдутугар Баатараҕа түмүктүүр тэрээһинэ ыытыллыаҕа.

Мэҥэ Хаҥалас улууһун дьаһалтатын пресс-сулууспата