СЫЫМАХТАР ГААС КИИРИИТИН, СУОЛ ӨРӨМҮӨНҮН КҮҮТЭЛЛЭР

СЫЫМАХТАР ГААС КИИРИИТИН, СУОЛ ӨРӨМҮӨНҮН КҮҮТЭЛЛЭР

Бүгүн улуус баһылыгын, салалтатын ааспыт сыллааҕы үлэтин отчуоттуур бөлөх Баатара, 1-кы Баатара, Мэлдьэхси нэһилиэктэригэр үлэлиир.

Сыымах 60 олохтооҕо

улуус баһылыга Дмитрий Тихонов отчуоту туруоруутугар гаас ситимэ тардыллыытын бырайыактааһыныгар үлэ барбытын сэргии иһиттилэр.

Дмитрий Иванович былыырыыҥҥы көрсүһүүгэ уон үс туруорсуу киирбититтэн үһэ быһаарыллыбыт, уона үлэҕэ сылдьарын эттэ.

Олохтоохтор суругунан, ону тэҥэ утары туран ыйытыыларын сытыытык биэрдилэр.

Тыа хаһаайыстыбатыгар

⁃ дулҕа астарыытыгар көрүллэр өҥө сыанатын,

⁃ чааһынай сылгыларга судаарыстыба өттүттэн тоҕо көмө көрүллүбэтин,

⁃ экоферма тутуута хаһан саҕаланарын,

⁃ улуус өттүттэн сылгыга субсидияны,

⁃ сүөһү төбөтүн ахсаанын элбэтии былаанын,

⁃ арыы сыаҕа нэһилиэккэ үлэтин,

⁃ «Саҥа олох» тэрилтэ ханнык боруода ынаҕы аҕаларын

туһунан туоһуластылар.

Доруобуйа харыстабылыгар өрөбүллэргэ ыалдьыбыт киһиэхэ көмө көрүллэригэр ыксаллаах быһыы-майгы сулууспа үлэтин.

Суол-иис, сир-уот, тутуу өттүгэр

- Аллараа Бэстээххэ элбэх оҕолоохторго сир түҥэтиитин, бэриллибит учаастактары уотунан, гааһынан хааччыйыы хаһан ыытылларын,

- Сыымахха дылы гаас ситимэ тардыллыытын, суол оҥоруутун үлэтин,

- Чараҥ муостата халаан кэмигэр алдьанар кутталлааҕынан саҥа муоста тутуллуутун, биэрэги бөҕөргөтүү үлэтин,

- тохтобула суох автобус сырыытын,

- исписэлиистэргэ олорор дьиэ тутуллуутун,

- өрүһү туоратарга бэйэ салгын олбохтоох суудунатын,

- сүөһүтэ суох, эбэтэр суох буолбут дьон сирдэрин хайдах наадыйар дьоҥҥо биэриэххэ сөбүн.

Үөрэҕирии эйгэтигэр уһуйаан тутуллуутун ыйыттылар, манна улуустааҕы үөрэҕирии салалтатын салайааччыта Гаврил Толстяков 35 миэстэлээх Сыымах уһуйаанын тутуллуута 2025 сылтан саҕаланыаҕа диэн сонно тута хоруйдаата.

Социальнай бэлиитикэ өттүнэн

- үс оҕоттон элбэх оҕолоохторго ханнык чэпчэтиилээх ипотека баарын,

- түөртэн үөһэ элбэх оҕолоохторго бэриллэр бириэмийэлэри, уордьаннары ылыы бэрээдэгин туһунан ыйытыылар киирдилэр.

Ону тэҥэ үрэххэ быһыт тутуллуутун, котельнай оһохторун өрөмүөнүн, уу таһар массыынаны, култуура киинигэр материально-техническай баазаны бөҕөргөтүүнү, уот линиятын бөҕөргөтүүнү, оскуола интернатын тутууну, саҥалыы медиа-бибилэтиэкэни, свалканы астарыыны, сахалартан бастакы Сэбиэскэй Сойуус Дьоруойа Федор Кузьмич Попов боруонса пааматынньыгын туттарыыны туруорустулар.

Сонун этиилэринэн Өргөннөөххө баар саха сүөһүтүн хаһаайыстыбатыттан нэһилиэнньэҕэ туһа таһааран ыраас састааптаах, эмтээх үүтүнэн дьону сынньатар уонна эмтиир киини тэрийиини,

эдэр дьон ынах сүөһү ииттинэллэрин саҕалыырга көмөнү көрүүнү киллэрдилэр.

Мэҥэ Хаҥалас улууһун дьаһалтатын пресс-сулууспата