ТҮМЭН УОПСАСТЫБАННАЙ ХОЛБОҺУК СОБО ААХСЫЙА ЫЫТАР

«ТҮМЭН» УОПСАСТЫБАННАЙ ХОЛБОҺУК «СОБО» ААХСЫЙА ЫЫТАР

«Түмэн» уопсастыбаннай холбоһук анал байыаннай дьайыы саҕаланыаҕыттан дойдубут туһугар туруулаһа сылдьар буойуттарбытыгар анаан араас оҥоһуктары оҥорон, таҥастары тигэн, «Суорҕан», «Окуопа чүмэчитэ», «Харысхал», «Сетка өрүүтэ» уонна да атын аахсыйалары тэрийэн туох кыах баарынан куруутун улахан көмө буолар.

Бүгүн, бэҕэһээ «Собо» аахсыйаны биллэрэн, уолаттарбыт балык миинэ оҥостон төрөөбүт дойдуларын аһа күүстэригэр күүс эптин диэн уон куул балыгы ыраастаан, хатаран, бороһуокка кубулутан, чэй курдук бакыаттаан бэлэмнии сылдьаллар.

Бу аахсыйаҕа Табаҕа оскуолатын үлэһиттэрэ, Акулина Робертовна Устинова, Сергей Иннокентьевич Куличкин, биирдиилээн үтүө санаалаах дьон собо аҕалан туттарбыттарыгар, Майа уһуйааннарын кэлэктииптэрэ балыгы хатаран, биирдии бакыакка суулаан көмө буолалларыгар махталларын тиэрдэллэр.

Ону таһынан оскуола оҕолоро суруйбут суруктарын, саа уоһугар кэтиллэр чехоллары, чэйдэри,арчыланарга, ыраастанарга аналлаах оту, окуопа чүмэчилэрин бэлэмнээбиттэр.

Үтүө санаалаах дьоммутун туора турбакка «Түмэн» уопсастыбаннай холбоһук үлэтигэр кыттыһан күүс-көмө буоларгытыгар ыҥырабыт.

Мэҥэ Хаҥалас улууһун дьаһалтатын пресс-сулууспата