ТЫА ХАҺААЙЫСТЫБАТЫН ҮЛЭҺИТТЭРИГЭР АНАММЫТ КҮН

ТЫА ХАҺААЙЫСТЫБАТЫН ҮЛЭҺИТТЭРИГЭР АНАММЫТ КҮН

Бүгүн, ахсынньы 1 күнүгэр, Т.Пинегин аатынан «Парус» спорт уораҕайыгар улууспутугар биллэриллибит үс сыллаах Тыа хаһаайыстыбатын сылларын чэрчитинэн үлэни өрө туппут туруу үлэһит дьоммутугар, тыа хаһаайыстыбатын үлэһиттэригэр, бэтэрээннэригэр ананар күн тэрилиннэ.

Бу күн уопсайа 150-чэкэ киһи кэлэн кыттыыны ылла.

Улуус баһылыгын социальнай уонна имиджевэй бэлиитикэҕэ солбуйааччы Альбина Григорьева манна мустубут бар дьонун эҕэрдэлээн туран өр сыллаах, үтүө суобастаах үлэлэрин, улууспутугар тыа хаһаайыстыбата сайдарыгар тус кылааттарын иһин

«Тумул» ТХПК дайааркатыгар Антонина Ковлековаҕа,

Хаптаҕай нэһилиэгин тыа хаһаайыстыбатын исписэлииһигэр Людмила Жирковаҕа,

бааһынай хаһаайыстыба салайааччытыгар Егор Жирковка

улуус баһылыгын Грамотатын,

фермерскай бааһынай хаһаайыстыба салайааччытыгар Александр Протопоповка

улуус баһылыгын махтал суругун туттарда.

Тэрээһин чэрчитинэн кыһыннары-сайыннары биир күн өрөбүлэ суох үлэлиир дьоммутугар анаан анаалыс ылыыта, быраастарга көрдөрүнүү тэрилиннэ.

Ол курдук, саахарга анаалыс, онкомаркер, спирография туттардылар, ЭКГ, УЗИ оҥоттордулар, харах дабылыанньатын кээмэйдэттилэр, хирург, офтальмолог, окулист, кардиолог, терапевт, дерматолог, эндокринолог, отоларинголог курдук исписэлиистэргэ көрдөрүннүлэр.

Ону тэҥэ, биирдиилээн бастыыр иһин дуобакка, саахымакка, буулдьанан ытыыга, хабылыкка, хаамыскаҕа, остуол тиэниһигэр, харбааһыҥҥа күрэх ыытылынна.

Тэринэн кэлбит аҕыс хамаанда «Көрдөөх стартар» күрэххэ кыаһалаах сүүрүүгэ, ракеткаҕа тиэнис мээчигин ууран сүүрүүгэ, тоһоҕо саайыытыгар, дартска, ханаат тардыһыытыгар күөн-көрүстүлэр.

Түмүгэр бааһынай хаһаайыстыбалар холбоһуктаах хамаандалара кыайыылааҕынан таҕыста

Иккис миэстэ Улуустааҕы тыа хаһаайыстыбатын салалтатын,

үһүс миэстэҕэ «Хоту» тыа хаһаайыстыбатын бородууксуйатын оҥорон таһаарар кэпэрэтиибин хамаандалара буоланнар мэтээллэринэн, бириистэринэн наҕараадаланнылар.

Бу курдук улууспут тыа хаһаайыстыбатын үлэһит дьоно дуоһуйа күрэхтэһэн, уочарата, үтүрүһүүтэ суох тустаах быраастарга көрдөрүнэн, доруобуйаларын туруктарын билэн, анаалыс арааһын туттаран, бассейнҥа сөтүөлээн астынан, дуоһуйан бардылар. Кэлбит быраастарга, тэрийээччилэргэ, «Парус» спорт уораҕайын үлэһиттэригэр махталларын биллэрдилэр.

Мэҥэ Хаҥалас улууһун дьаһалтатын пресс-сулууспата