ТЫА ХАҺААЙЫСТЫБАТЫН ҮЛЭҺИТТЭРИГЭР АНАММЫТ ТЭРЭЭҺИН

ТЫА ХАҺААЙЫСТЫБАТЫН ҮЛЭҺИТТЭРИГЭР АНАММЫТ ТЭРЭЭҺИН

Бүгүн Аллараа Бэстээххэ Т. Пинегин аатынан “Парус” спорт уораҕайыгар улууспут тыа хаһаайыстыбатын үлэһиттэригэр, бэтэрээннэригэр, туруу үлэһит дьоммутугар анаммыт сынньалаҥ тэрээһин ыытылынна.



Үөрүүлээх чааһыгар улуус баһылыга Дмитрий Тихонов, Ил Түмэҥҥэ улууспут дьокутаата Андрей Находкин, СӨ тыатын хаһаайыстыбатын миниистирин бастакы солбуйааччы Анна Стручкова, СӨ Сири мелиорациялааһын уонна тыа сирин уунан хааччыйыы судаарыстыбаннай бүддьүөт тэрилтэ салайааччыта Дмитрий Махаров мустубут бар дьону эҕэрдэлээн туран өр сыллаах, үтүө суобастаах үлэлэрин, улууспутугар тыа хаһаайыстыбата сайдарыгар тус кылааттарын иһин бастыҥ үлэһит дьоммутугар наҕараадалары туттардылар.

Тэрээһин чэрчитинэн улуус кииннэммит балыыһатын хирург, офтальмолог, кардиолог, терапевт, УЗИ быраастара үлэни өрө туппут үлэһит дьоммут доруобуйаларын туруктарын көрдүлэр, анаалыстары туттулар. Спорт уораҕайыгар дьарыктанар саалаҕа, бассейҥҥа киирии босхо тэрилиннэ. Социальнай пуонда, социальнай көмүскэллээх буолуу салалта, МФЦ, АЭБ, РСХБ, Сбербанк исписэлиистэрэ кэлэн интириэһиргиир боппуруостарга ыйан-кэрдэн биэрдилэр.

Улуустааҕы спорт уонна физическэй култуура салалтата биирдиилээн уонна хамаанданан күрэхтэри тэрийэн ыыттылар. Сүрүн судьуйанан Вадим Федоров, сэкэритээринэн Галина Аржакова салалта сүрүн исписэлиистэрэ үлэлээтилэр.

Улууспутугар тыа хаһаайыстыбатын сылынан «Көрдөөх стартар» күрэх тэрилиннэ. Көрүҥнэринэн кыаһалаах сүүрүү, ракеткаҕа тиэнис мээчигин ууран сүүрүү, тоһоҕону маска саайан киллэрии, дартс, ханаат тардыһыыта буолла.

Тыҥааһыннаах күрэх түмүгүнэн уопсайа 6 хамаанда кыттыбытыттан ветеринарнай салалта кыайыылааҕынан таҕыста, улуустааҕы тыа хаһаайыстыбатын салалтатын исписэлиистэрэ 2 миэстэ, «Хоту» оҥорон таһаарар кэпэрэтиип хамаандата бочуоттаах 3 миэстэ буолары ситистилэр.

Ону тэҥэ биирдиилээн бастыыр иһин дуобакка, саахымакка, буулдьанан ытыыга, хабылыкка, хаамыскаҕа күрэх ыытылынна. Кыайыылаахтарга улуус баһылыгын бастакы солбуйааччы Василий Михайлов, тыа хаһаайыстыбатын салалтатын салайааччыта Иннокентий Семенов мэтээллэри, бириистэри туттардылар.

Тэрээһин түмүктүүр чааһынан улууспут талааннаах, айар-тутар дьоҕурдаах дьонун эҕэрдэ кэнсиэрэ ыытылынна.

Бу күн улууспут тыа хаһаайыстыбатын үлэһит дьоно дуоһуйа сынньанан, доруобуйаларын чэбдигирдэн, тустаах быраастарга, исписэлиистэргэ көрдөрүнэн, интэриэһиргиир боппуруостарыгар хоруйдары ылан, эҕэрдэ кэнсиэри дуоһуйа көрөн астынан тарҕастылар.

Мэҥэ Хаҥалас улууһун дьаһалтатын пресс-сулууспата