Уһук сытар Чыамайыкы нэһилиэгэр субуота күн улуус баһылыгын отчуотун истэ.

Уһук сытар Чыамайыкы нэһилиэгэр субуота күн улуус баһылыгын отчуотун истэ, санаа атастаһа 57 олохтоох көхтөөхтүк кэлэн кытынна. Баһылык Александр Захаров мунньаҕы саҕалаата. Улууспут баһылыга Дмитрий Тихонов үлэ түмүгүн сырдатар дакылаатын кэннэ отчуот кыттыылаахтара интэриэһиргиир ыйытыктарын биэрдилэр.



Ааспыт сылга киирбит туруорсуулартан бөрө боппуруоһун быһаарыыга үп көрүллүүтэ, уу таһар массыына ылыыта, дымовой турбалары уларытыы туолбуттар.

Бүгүҥҥү мунньахха киирбит ыйытыктар, этиилэр, туруорсуулар:

-Булчуттары хонтуруоллуур, бэрээдэктиир наада. Булт көҥүлүн болдьоҕун кылгатыахха, туйахтаах кыыллар ахсааннара аҕыйыы турар, ол да иһин бөрөлөр сүөһүнү, сылгыны тардыылара тахсар диэн санааларын эттилэр.

-Аптека боппуруоһа. Биэлсэр-акушер пууннарыгар аптека арылларын боппуруоһугар улууска үлэ бара турарын сэргии иһиттилэр.

-Сүөһү төбөтүгэр бэриллэр харчы. Быйылгыттан кэтэх хаһаайыстыбалар төбөҕө ылар харчыларын отчуоттуур буолалларын туһунан чуолкайдастылар. Бу сыллааҕы үбү хаһаайыстыба сайдыытыгар туһаммыттарын туһунан кэлэр сыл тохсунньу ыйыгар отчуоттуохтаахтар, чектэргитин, квитанцияларгытын мунньа сылдьыҥ диэн этилиннэ.

-Күндү таас көстүбүтүнэн туох хамсааһыннар баалларын, экология өттүттэн көмүскэллээх буолуутун боппуруоһугар Ил Түмэн дьокутаата, сир баайыгар уонна айылҕа боппуруостарыгар сис кэмитиэтин бэрэссэдээтэлэ Андрей Находкин санаатын иһиттилэр.

-Эдэр исписэлиистэр кэлэллэригэр дьиэнэн хааччыллыы боппуруоһун быһаарарга түөрт квартиралаах уопсай дьиэ өрөмүөнэ ыытылларыгар көмө көрүллэрин туруорсаллар.

Ону таһынан үөрэхтэрин бүтэрбит ыччаттарга идэтинэн хайаан да 5 сыл үлэлиэхтээх диэни киллэрэллэрэ буоллар диэн этэллэр.

-Ынах сүөһү, сылгы төбөтүн ахсаана аччыы турарын тохтотор инниттэн. Сүөһү иитэр дьон үксүлэрэ сааһырда, биир-икки сылынан дьарыктарын тохтотуохтарын сөп. Онон улууспут нэһилиэктэринэн кэпэрэтииптэри тэрийэн, ыаллартан сүөһүлэрин хомуйан көрөр хотоннор тутуллалларын көҕүлээҥ диэн этии киллэрдилэр.

Ону таһынан:

-Быйыл сайын "Чүүйэ" МУТ субан сүөһүлэрин сайылата аҕаларын,

-Хочо балыыһатын стационара тоҕо сабыллыбытын,

-"Земскэй педагог" бырагыраама төһө көдьүүстээҕин,

-Хаарбах дьиэттэн дьону көһөрүү бырагыраама салгыы үлэлиирин,

-Майатааҕы үүт собуотун дьоҥҥо иэһин төлүүрүн быһаарыыны

ыйытан, толору хоруйдары ыллылар.

Мэҥэ Хаҥалас улууһун дьаһалтатын пресс-сулууспата