Үлэ сылыгар - үлэ дьоно

Бу күннэргэ Нөөрүктээйи нэһилиэгэр Ленин аатынан сопхуос киин гарааһын автопаркатын кэлэктиибэ, үлэ бэтэрээннэрэ үтүө санаа чэрчитинэн тахсан көхтөөх субуотунньук тэрийдилэр. Саҥа арыллыбыт искибиэр Ленин аатынан сопхуос аатын сүктэ.

Бу туһунан биһиэхэ үлэ бэтэрээнэ Руслан Кычкин сиһилии сырдатта:

- Биһиги Ленин аатынан сопхуос бэтэрээннэрэ өр илдьэ сылдьыбыт ыра санаабыт дьэ туолла. Уопсай сүбэнэн, үбүнэн кыттыһан, дьаһалта көмөлөһөн Владимир Ильич Лениҥҥэ пааматынньык уонна биһиги сопхуоспут дьонугар мемориал туруордубут. Улуу сирдьиккэ пааматынньык туруорбуппут барыбытын үөртэ, долгутта. Бу пааматынньыгы ааспыт үйэ аҕыс уонус сылларыгар, норуот худуоһунньуга Афанасий Бродников оҥорбута. Хомойуох иһин, уларыта тутуу, ыһыллыы саҕана умнууга хаалбыта.

Ленин пааматынньыгын туруоруу суолтата биһиги көлүөнэҕэ улахан. Сэбиэскэй былаас биһиги эдэр сааспыт үлүскэннээх үлэтин үгэнэ. Олоҕу айбыт-туппут сылларбыт. Оттон мемориалга биһиги сопхуос тумус туттар туруу үлэһит дьоно көмүс буукубанан киирдилэр: дириэктэрбит Михаил Захаров, Социалистическай Үлэ Дьоруойдара Екатерина Новгородова, Гаврил Самсонов, Судаарыстыбыннай Премия лауреата Михаил Егоров уо.д.а. Кинилэр бары Ленин аатынан сопхуоска олохторун үтүө сылларын анаабыттара.

Ону тэҥэ манна саҥа искибиэргэ ыскамыайкалары туруордубут. Инникитин отделениеларынан үлэлээбит бары нэһилиэктэр: Бөкө, Чүүйэ, Хара, Лоомтука, Хаатылыма, Ороссолуода, Хаптаҕай бастыҥ үлэһит дьонун-сэргэтин аатарын-суолларын, ситиһиилэрин киллэрэн туран улахан стелла туруорар былааннаахпыт.

Кэлэр кэми уһансыбыт, дьоһун олоҕу тутан кэлбит ытык дьоммут сырдык ааттара ахтылла турдун, үйэлэргэ умнуллубатын!

Мэҥэ Хаҥалас улууһун дьаһалтатын пресс-сулууспата