УЛУУ КЫАЙЫЫ 80 СЫЛЫН КӨРСӨ СҮРЭХТЭН СҮРЭХХЭ БЫРАЙЫАК ХОТУН ТӨҤҮЛҮ НЭҺИЛИЭГИТТЭН САҔАЛАННА

УЛУУ КЫАЙЫЫ 80 СЫЛЫН КӨРСӨ «СҮРЭХТЭН СҮРЭХХЭ» БЫРАЙЫАК ХОТУН ТӨҤҮЛҮ НЭҺИЛИЭГИТТЭН САҔАЛАННА

Бүгүн Хотун Төҥүлү нэһилиэгэр Аҕа дойду сэриитигэр Улуу Кыайыы өрөгөйдөөх 80 сылын көрсө “Сүрэхтэн сүрэххэ” Мэҥэ Хаҥалас улууһун бырайыага үөрүүлээх быһыыга-майгыга саҕаланна. Бу күн 7 нэһилиэктэн сэрии сылларын оҕолоро, үлэ бэтэрээннэрэ, аҕам саастаахтар тоҕуоруһа муһуннулар.

“Сүрэхтэн сүрэххэ” бырайыак Хотун Төҥүлү сиригэр-уотугар бастакы хардыыта оҥоһуллубута бэйэтэ туспа суолталаах. Аҕа дойду сэриитигэр Аляска-Сибирь салгын трассата Сэгэлэй күөлгэ саппаас аэродром буолан Төҥүлүлэр манна үлэлээн-хамсаан Кыайыыны уһансыбыттара.

Бырайыак сүрүн сыала Аҕа дойду

сэриитигэр дойду көмүскэлигэр турбут, тыылга Кыайыыны уһансыбыт биир дойдулаахтарбыт, сэрии сылларын оҕолорун ааттарын үйэтитии буолар.

Бырайыак чэрчитинэн Аллараа Бэстээх бөһүөлэгэр, Төҥүлү, Баатара, Бүтэйдээх, 2-с Наахара нэһилиэктэригэр, Майа сэлиэнньэтигэр балаҕан ыйыгар уонна алтынньыга тэрийэр хамыыһыйа десана үлэлиэҕэ.

Тэрээһин үөрүүлээх чааһыгар улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, Төҥүлү нэһилиэгин баһылыгын солбуйааччы Степан Заровняев, улуустааҕы Ытык сүбэ салайааччыта Зиновий Игнатьев, улуус бэтэрээннэрин сүбэтин бэрэссэдээтэлэ Евдокия Решетникова, социальнай бэлиитикэ салалтатын салайааччыта Октябрина Кулешова тэрээһин кыттыылаахтарыгар эҕэрдэ тылларын эттилэр.

Зиновий Игнатьев салайааччылаах автодесант хоту эҥэр нэһилиэктэринэн тыыл бэтэрээннэригэр улуус баһылыга Дмитрий Тихонов махтал суруктарын кытары оҕуруот аһыттан күһүҥҥү бэлэҕи туттардылар.

«Манчаары ыччаттара» этэрээт уонна Төҥүлүтээҕи техникум устудьуоннара Октябрина Кулешова салайыытынан тыыл бэтэрээннэригэр көмө оҥордулар.

Майатааҕы “Мичил” уһуйаан дириэктэрэ, сюцай маастара Виктория Бурнашева психологическай көмөнү оҥордо. Майатааҕы үһүс көлүөнэ оскуолата Людмила Заровняева-Стручкова салайааччылаах араас интириэһинэй маастар кылаастары ыытаннар дьон сэҥээриитин ыллылар уонна эҕэрдэ кэнсиэри тэрийэн тэрээһини киэргэттилэр.

Ону тэҥэ Төҥүлү нэһилиэгин ытык сиригэр, Кыайыы монуменыгар долгутуулаах түгэҥҥэ «Сүрэхтэн сүрэххэ» бырайыак тэрийэр бөлөҕүн аатыттан бэтэрээннэргэ Амынньыкы уус сиэнэ Иван Гоголев чочуйан оҥорон таһаарбыт анал эмбилиэмэлээх ыскамыайканы бэлэх ууннулар.

Бу күн аҕам саастаах дьоммут атах тэпсэн олорон ирэ-хоро сэһэргэһэн, сэргэхсийэн, санааларын атастаһан, сүргэлэрэ көтөҕүллэн тарҕастылар.

Мэҥэ Хаҥалас улууһун дьаһалтатын пресс-сулууспата