УЛУУ КЫАЙЫЫ 80 СЫЛЫН КӨРСӨ “УЛУУ КЫАЙЫЫ ТҮМЭР КҮҮҺЭ” ПЛЕНУМ ЫЫТЫЛЫННА

УЛУУ КЫАЙЫЫ 80 СЫЛЫН КӨРСӨ “УЛУУ КЫАЙЫЫ ТҮМЭР КҮҮҺЭ” ПЛЕНУМ ЫЫТЫЛЫННА
 
Бүгүн, тохсунньу 16 күнүгэр, Д.Ф. Ходулов аатынан Култуура киинигэр Аҕа Дойду сэриитигэр Улуу Кыайыы 80 сылын көрсө улуус бэтэрээннэрин Сүбэтин «Улуу Кыайыы түмэр күүһэ» диэн киэҥ ыҥырыылаах пленума ыытылынна.
 
Мунньахха нэһилиэк баһылыктара, бэтэрээн Сэбиэтин бэрэссэдээтэллэрэ, ыччат бэлиитикэтин исписэлиистэрэ, көхтөөх аҕам саастаах дьоммут, ыччаттар кыттыыны ыллылар.
 
Мунньахтыыр чааска улуус баһылыга Дмитрий Тихонов, улуус бэтэрээннэрин Сүбэтин бэрэссэдээтэлэ Евдокия Решетникова, М.К. Аммосов аатынан Хотугулуу-Илиҥҥи федеральнай университет бэтэрээннэрин Сэбиэтин бэрэссэдээтэлэ, өрөспүүбүлүкэтээҕи сэрии уонна үлэ бэтэрээннэрин Сэбиэтин президиумун чилиэнэ Екатерина Никитина, Майа сэлиэнньэтин баһылыга Алексей Неустроев,
2-ис Наахара нэһилиэгин бэтэрээннэрин Сэбиэтин бэрэссэдээтэлэ Матрена Устинова, улуустааҕы үөрэҕирии салалтатын салайааччытын солбуйааччы Михаил Петров, Майатааҕы үһүс көлүөнэ оскуолатын салайааччыта Людмила Заровняева-Стручкова, “Сэрии сылларын оҕолоро” улуустааҕы уопсастыбаннай түмсүү салайааччыта Анатолий Чичахов, улуус кылаабынай бырааһын солбуйааччыта Зинаида Андреева, култуураҕа уонна духуобунай сайдыыга салалта салайааччыта Анна Исакова, улуустааҕы Ытык Сүбэ салайааччыта Зиновий Игнатьев, социальнай бэлиитикэ салалтатын салайааччыта Октябрина Кулешова, нэһилиэнньэ социальнай көмүскэллээх буолуутун кэлим киинин салайааччыта Иван Шестаков, улуустааҕы клиентскай сулууспа салаатын салайааччытын солбуйааччы Лена Винокурова улууспутугар, өрөспүүбүлүкэҕэ Улуу Кыайыы 80 сылн көрсө ыытыллар үлэни сырдаттылар итиэннэ салгыы ыытыллар үлэни торумнаатылар. Түмүккэ пленум быһаарыытын ылыннылар.
 
Пленум чэрчитинэн 2024 сыл түмүгүнэн улууспут уон бастыҥ бэтэрээн спортсменын чиэстиир үөрүүлээх түгэнэ буолла. Сыл устата спорт араас көрүҥнэригэр бастыҥ көрдөрүүлээх бэтэрээннэрбитигэр улуус баһылыга Дмитрий Тихонов эҕэрдэлээн туран туоһу суруктары итиэннэ өйдөбүнньүк кубоктары туттарда.
 
Ону тэҥэ баһылык Дмитрий Тихонов улууспутугар бэтэрээннэр хамсааһыннарын тэрийиигэ көхтөөх үлэлээх, тус кылааттарын киллэрбит дьоммутугар махтал суруктарын туттарда.
 
СӨ Ис дьыала министиэристибэтин бэтэрээннэрин Сэбиэтин бэрэссэдээтэлэ, өрөспүүбүлүкэтээҕи сэрии уонна үлэ бэтэрээннэрин Сэбиэтин президиумун чилиэнэ Эдуард Федоров 2024 сыл түмүгүнэн улууспутугар уонна өрөспүүбүлүкэҕэ бэтэрээннэр хамсааһыннарыгар көхтөөх кыттыылаах дьоммутугар Сэрии уонна үлэ бэтэрээннэрин өрөспүүбүлүкэтээҕи Сэбиэтин бочуоттах грамоталарын, махтал суруктары үөрүүлээх быһыыга туттарда.
 
“Сэрии сылларын оҕолоро” улуустааҕы уопсастыбаннай түмсүү салайааччыта Анатолий Чичахов бастыҥ үлэлээх, көхтөөх дьоммутугар өрөспүүбүлүкэ бочуоттаах грамоталарын туттарда.
 
Күн иккис аҥаарыгар «Кыталык» улуустааҕы уопсастыбаннай кииҥҥэ ыччат бэлиитикэтин исписэлиистэригэр, көхтөөх ыччаттарбытыгар сүбэ мунньах итиэннэ "Дьол түһүлгэтэ" уопсастыбаннай кииҥҥэ аҕам саастаах дьоммутугар, бэтэрээн Сэбиэтин бэрэссэдээтэллэригэр төгүрүк остуол тэриллэн ыытылынна.

Мэҥэ Хаҥалас улууһун дьаһалтатын пресс-сулууспата