УЛУУСПУТ ДЬОНУН ҮЛЭНЭН ХААЧЧЫЙЫЫ ТУЛА ПАНЕЛЬНАЙ СЕССИЯ ЫЫТЫЛЫННА

УЛУУСПУТ ДЬОНУН ҮЛЭНЭН ХААЧЧЫЙЫЫ ТУЛА ПАНЕЛЬНАЙ СЕССИЯ ЫЫТЫЛЫННА

Үлэ дьаарбаҥкатын чэрчитинэн улууспут дьонун үлэнэн хааччыйыы тула панельнай сессия ыытылынна.

Сессияны улуустааҕы дьарыктаах буолуу киинин салайааччыта Федор Белолюбский иилээн ыытта.

Манна нэһилиэктэр баһылыктара, салалталар салайааччылара, тус интэриэстээх дьон кыттыыны ыллылар.

Сессия хаамыытынан:

Улуус баһылыгын тутуу боппуруостарыгар солбуйааччы Василий Филиппов улууспут дьонун үлэнэн хааччыйыыга былааннаах үлэ барыахтааҕын ыйда.

СӨ Өлүөнэ муостатын тутуу дирекциятын генеральнай дириэктэрэ Артем Артемьев муоста тутулун, тутуллар сирин, этээптэрин бырайыагын туһунан сиһилии кэпсээтэ. Муостаҕа барар суол Хаптаҕай нэһилиэгин таарыйбакка арҕаа өттүнэн федеральнай суолга тахсарын, кыра массыыналарга босхо, улахан грузовой массыыналарга 2500 тиийэ төлөбүрдээх буоларын эттэ. Ону тэҥэ, урбаан өттүнэн суол кытыытыгар тохтоон сынньанар кафелары, массыына өрөмүөннүүр сиэрбистэри арыйан бэлэмнии турарга сүбэлээтэ.

Улууспутугар сүрүн үлэ миэстэтин таһааран турар «Саха сирин тимир суоллара» АХ генеральнай дириэктэрин солбуйааччы Алексей Местников тэрилтэ үлэтин билиһиннэрдэ.

Колыма тыраассатын таһынан Магадан диэки тимир суол барара былааннанар, онно 4000 кэриҥэ үлэ миэстэтэ тахсар, манна олохтоохтор ылсан үлэлэһэллэрэ табыгастаах буолуо диэн бэлиэтээтэ.

«Саҥа олох» ХЭТ бэрэстэбиитэлэ Иван Матвеев Баатара нэһилиэгэр

260 төбөҕө тутуллуохтаах роботозированнай аныгы хотон туһунан билиһиннэрдэ. Манна 25 үлэ миэстэтэ тахсар, үлэһиттэргэ толору хааччыллыылаах олорор дьиэ бэриллэр диэн эттэ.

Ил Түмэн дьокутаата Тихон Скрябин тыа сирин олоҕун-дьаһаҕын туһунан урут уруккуттан сыыһа өйдөбүл баран, билиҥҥи ыччат олохсуйуон баҕарбат, онон каадыр тиийбэтэ тыа сирин тыын боппуруоһа буолар,

онон бу бэлиитикэни тосту уларытар сыалтан баар ньымалары барытын туһанан, тыа сирин оруолун өрө тутан аныгылыы сайыннарар ирдэнэр диэн эттэ.

Хайа да кэмҥэ тутуу ньиргиччи барар. Ол эрэн, манна үксүн кэлии омуктар үлэлииллэрэ кистэлэҥ буолбатах. Бу боппуруоска, олохтоохтоору тутуу үлэтигэр сыһыарыыга туох үлэ барарын Саха сирин тутааччыларын сойууһун салайааччыта Михаил Охлопков сырдатта, 2023 сылга өрөспүүбүлүкэ үрдүнэн 54 социальнай инфраструктура эбийиэктэрэ тутуллубуттарын иһитиннэрдэ.

Сессия үөрүүлээх чааһыгар Жатайдааҕы техникум дириэктэрэ Владимир Тихонов, «Жатайдааҕы судоверфь» борохуоттары тутар собуот дириэктэрэ Влад Пермяков, улуус баһылыгын тутуу боппуруостарыгар солбуйааччы Василий Филиппов бииргэ үлэлиир туһунан сөбүлэҥ түһэристилэр.

Бу сөбүлэҥ чэрчитинэн идэлэрин толору баһылаабыт специалистар үүнэн тахсалларыгар, улуус өттүттэн эрдэ кэпсэтиллибитин курдук, В.Н. Оконешников аатынан Павловскай орто оскуолатыгар хараабыллары тутарга оскуола саҕахтан үөрэтэр профильнай кылаас арылларыаҕа.

Ону тэҥэ, тутуу эйгэтигэр каадырдары таһаарарга Дьокуускайдааҕы коммунальнай строительнай техникуму кытта илии баттастылар.

Мэҥэ Хаҥалас улууһун дьаһалтатын пресс-сулууспата