УЛУУСПУТ ТӨРҮТТЭММИТЭ ҮБҮЛҮӨЙДЭЭХ 95 СЫЛЫНАН БЭЛИЭ ТЭРЭЭҺИН

УЛУУСПУТ ТӨРҮТТЭММИТЭ ҮБҮЛҮӨЙДЭЭХ 95 СЫЛЫНАН БЭЛИЭ ТЭРЭЭҺИН

Бүгүн, олунньу 10 күнүгэр, улууспут төрүттэммитэ үбүлүөйдээх 95 сылын көрсө киэҥ хабааннаах тэрээһиннэр ыытылыннылар.

Ол курдук, сарсыардаттан уопсастыбаннас сахалартан бастакы академик Владимир Петрович Ларионов төрөөбүтэ 87 сылынан төрөөбүт дойдутугар 1-кы Тыыллыма нэһилиэгэр итиэннэ кини аатын сүгэр Майа орто оскуолатыгар олорбут олоҕун, оҥорбут үлэтин-хамнаһын ахтан-санаан аастылар. Ону тэҥэ улууспут, өрөспүүбүлүкэбит сайдыытыгар улахан өҥөлөөх салайааччыларбыт Семен Захарович Борисов, Иван Гаврильевич Тимофеев уонна Василий Васильевич Скрябин бүүстэригэр кинилэр үтүө ааттарыгар сүгүрүйэн, үлүскэн үлэлэрин ахтан-санаан туран тыыннаах сибэкки дьөрбөтүн ууран сүгүрүйдүлэр.

Бэлиэ күн Нөөрүктээйи нэһилиэгэр улуус баһылыга Дмитрий Тихонов, нэһилиэк баһылыга Николай Федоров, улуус мунньаҕын дьокутаата Дьулустаан Захаров улууспутун кытта эт саастыылаах ытык киһибитин Анна Петровна Охлопкованы үбүлүөйдээх 95 сааһынан эҕэрдэлээтилэр.

Нөөрүктээйи нэһилиэгин, улууспут бочуоттаах олохтооҕо, тыыл, үлэ бэтэрээнэ, сэрии сылларын оҕото Анна Петровна улууспут төрүттэммит күнүгэр Догдоҥо нэһилиэгэр күн сирин көрбүтэ. Оҕо сааһа сэрии сылларыгар ааһан, улахан дьону кытта тэҥҥэ үлэлээн, Улуу Кыайыыны уһансан, сааһын тухары үлэни өрө тутан кэлбит үтүө киһибит буолар.

Күн иккис аҥарыгар Майа сэлиэнньэтигэр Д.Ф. Ходулов аатынан Култуура киинигэр өбүгэлэрбит төрүт дьарыктарын, баай ис хоһоонноох култуурабытын үрдүктүк тутан илдьэ сылдьар "Мэҥэ уус", “Мэҥэ тимир уустара”, "Мэҥэ сыахай", "Уран Майа" түмсүүлэр быыстапкалары туруордулар. Тарбахтарыгар талааннаах, айылҕаттан айдарыылаах күндү дьоммут үлэлэрэ дьон-сэргэ сөҕүүтүн, биһирэбилин ылла.

Тэрээһин үөрүүлээх чааһа улууспут төрүттэммитэ 95, Арассыыйаҕа Аҕа дойдуну көмүскээччи, өрөспүүбүлүкэҕэ Ийэ дойдуну көмүскээччи сылларыгар, улууспутугар Тыа хаһаайыстыбатын үһүс сылыгар, улууспутугар доруобуйа харыстабыла төрүттэммитэ 125, киэн туттар национальнай дьоруойбут Баһылай Манчаары төрөөбүтэ 220 сылыгар ананна.

Улуус баһылыга Дмитрий Тихонов, оройуон дьокутааттарын Сэбиэтин бэрэссэдээтэлэ Иннокентий Андросов, Ил Түмэн Судаарыстыбаннай мунньах сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин, улуус баһылыгын бастакы солбуйааччы Василий Михайлов, тутууга солбуйааччы Василий Филиппов, улуус дьаһалтатын тэрийэр үлэни уонна кадрдары салайар салаатын начаалынньыга Станислав Захаров, улуус кылаабынай бырааһа Иннокентий Павлов ыраахтан-чугастан кэлбит биир дойдулаахтарбытын үөрүүлээх күнүнэн эҕэрдэлээн туран бастыҥ дьоммутугар наҕараадалары туттардылар.

Наҕараадаламмыт, бэлиэтэммит дьоммутун өссө төгүл итиитик-истиҥник эҕэрдэлиибит. Инникитин даҕаны үгүс ситиһиилэри, үлэҕит-үөрэххит таһаарыылаах буоллун, төрөөбүт дойдубут сайдарын, чэчирии үүнэрин туһугар түмсүүлээхтик үлэлиэҕиҥ-хамсыаҕыҥ, айыаҕыҥ-тутуоҕуҥ!

Сиһилии️
https://mr-megino-kangalasskij.sakha.gov.ru/news/front/view/id/3482742

Мэҥэ Хаҥалас улууһун дьаһалтатын пресс-сулууспата