УЛУУСПУТ ЫЧЧАТТАРА ААН ДОЙДУТААҔЫ БЭСТИБЭЭЛГЭ

Кулун тутар 1-7 күннэригэр Сочи куоратка Сириус федеральнай территорияҕа тэриллибит ыччат куоратыгар Дойдубут Президенин Владимир Путин ыйааҕынан Аан дойдутааҕы ыччаты түмэр, сомоҕолуур бэстибээл ыытылынна.

Начнем будущее вместе диэн девизтээх бэстибээл сүрүн сыалынан Аан дойду инникитин түстэһэр ыччат дьону бииргэ түмүү буолла.

Манна 188 араас дойдуттан, 84 Арассыыйа субъектарыттан 20 000 кэриҥэ киһи кыттыыны ылла.

Саха сирин 110 киһилээх дэлэгээссийэтин састаабыгар Мэҥэ Хаҥаластан үс бастыҥ, олоххо көхтөөх көрүүлээх ыччаттарбыт киирдилэр.

Ол курдук, улуустааҕы социальнай бэлиитикэ салалтатын салайааччыта Октябрина Кулешова,

Нөрүктээйиттэн Хотугулуу Илиҥҥи Федеральнай университет РФ Хотугулуу Илиҥҥи норуоттар тылларын уонна култууратын институтун ыччаты кытта үлэлиир салаа 1 кууруһун устудьуона Алина Китаева уонна

Аллараа Бэстээхтэн Дьокуускайдааҕы Инсайт люди продюсерскай киин студиятын салайааччыта Айыына Федорова кытыннылар.

Бэстибээл киэҥ бырагырааматын иһинэн сарсыарда алта чаастан сэрээккэттэн саҕалаан, хойукка диэри араас хайысхаларынан үөрэтэр сэминээрдэр, лиэксийэлэр, маастар кылаастар, трениннэр, быыстапкалар, кэнсиэрдэр, көрсүһүүлэр тэриллэн ыытылынныллар. Мин инники үлэбитигэр элбэх саҥаны билбит,көрбүт киһи диэн санаанан салайтаран ордук ыччат бэлиитикэтин тенденциятын, граннары ылыы, видео контент туһунан үөрэтэр сэминээрдэри сэргии иһиттим. Дириҥ ис хоһоонноох бэстибээлтэн туһалааҕы тобулан улууспут үлэтигэр саҥа сүүрээннэри киллэрэр баҕалаахпын, - диэн улуустааҕы социальнай бэлиитикэ салалтатын салайааччыта Октябрина Кулешова бэлиэтээтэ.

Бэстибээл чэрчитинэн хас биирдии дэлэгээссийэ бэйэтин дойдутун, култууратын туһунан билиһиннэрэр истиэндэ бэлэмнээбиттэр, бибилэтиэкэ арыллыытыгар бэлэмнээн илдьэ барбыт кинигэлэрин туттарбыттар.

Аан дойду ыччата бэйэ бэйэлэрин кытта чугастык билистиннэр, сибээс олохтоотуннар диэн шефтэһэр дойдулары анаабыттар. Биһиги дэлэгээссийэбитигэр Соҕурууҥҥу Африка дойдутун сыһыарбыттар.

Африкаттан кэлбит ыччаттарга аал-луук маска көрсүһүү тэрийбиттэр, оһуокайдаан, саха норуотун култууратын, олоҕун-дьаһаҕын билиһиннэрбиттэр.

Ыччатка, дьиэ кэргэҥҥэ, киһи ис кыаҕар туһуламмыт бэстибээл түмүктүүр чааһыгар Дойду Президенэ Владимир Путин кыттыыны ылбыт, Аан дойду араас муннуктарыттан кэлбит ыччат ыйытыыларыгар хоруйдаабыт.

Мэҥэ Хаҥалас улууһун дьаһалтатын пресс-сулууспата