Улууспутугар өрөспүүбүлүкэтээҕи фитнес-аэробика чемпионата тэрилиннэ

Бүгүн, кулун тутар 30 күнүгэр, Аллараа Бэстээх Т. Пинегин аатынан Парус спорт уораҕайыгар фитнес-аэробика көрүҥэр XX-с өрөспүүбүлүкэтээҕи чемпионат тэрилиннэ.

Күрэх биһиги улууспутугар фитнес-аэробика көрүҥэ төрүттэммитэ 20 сылын чэрчитинэн ыытылынна.

Манна Дьокуускай куорат, Горнай, Ньурба, Уус Алдан, Амма, Чурапчы, Мэҥэ Хаҥалас улуустарыттан барыта 25 хамаанда бастыыр иһин күрэххэ кыттыыны ыллылар.

Күрэх үөрүүлээх арыллыытыгар оройуон дьокутааттарын Сэбиэтин бэрэссэдээтэлэ Иннокентий Андросов, Хара нэһилиэгин баһылыга, улуустааҕы фитнес-аэробика федерациятын бэрэссэдээтэлэ Дария Назарова тыл этэн кыттааччылары көрүстүлэр.

Күрэс сүрүн судьуйатынан СӨ физическэй култууратын уонна спордун туйгуна, СӨ үөрэҕириитин туйгуна, СӨ фитнес-аэробика федерациятын бэрэссэдээтэлэ, Аан дойдутааҕы арктическай оскуолатын физическэй култуура учуутала, аэробика тириэньэрэ Лилия Дмитриева үлэлээтэ.

Араас дьэрэкээн өҥнөөх килэбичигэс таҥастаах спортсменнар олус кыраһыабай, тэтимнээх көрүҥҥэ бөлөхтөрүнэн арахсан күөн көрүстүлэр.

Күрэх түмүгүн саҥа саҕалааччылар (Б бөлөх) уонна уопуттаах кыттааччылар (А бөлөх) диэн арааран таһаардылар. Ол курдук:

7-10 саастаахтарга (мини-кадеттар):

А бөлөххө I миэстэ Энергия Уус Алдан, II миэстэ Кыталык Мэҥэ Хаҥалас, III миэстэ Ванс Дьокуускай,

Б бөлөххө I миэстэ Күлүмчээнэ Горнай, II миэстэ Кырсада Горнай, III миэстэ Кыталык Бэйби Мэҥэ Хаҥалас хамаандалара буоллулар.

11-13 саастаахтарга (кадеттар)

А бөлөххө I миэстэ Энергия Уус Алдан, II миэстэ Новгородовцы Чурапчы, III миэстэ Алмазы Нюрбы,

Б бөлөххө I миэстэ Милениум Дьокуускай, II миэстэ Кыталык Мэҥэ Хаҥалас, III миэстэ Күн кыырпахтара Мэҥэ Хаҥалас Хорообут хамаандалара таҕыстылар.

14-16 саастаахтарга (юниордар)

А бөлөххө I миэстэ Энергия Уус Алдан, II миэстэ Кыталык Мэҥэ Хаҥалас, III миэстэ Новгородовцы Чурапчы,

Б бөлөххө I миэстэ Старфит Дьокуускай, II миэстэ Алмазы Нюрбы хамаандалар буоллулар.

Улахан дьоҥҥо I миэстэ Кыталык Мэҥэ Хаҥалас, II миэстэ Аллараа Бэстээхтээҕи Транспортнай техникум кэлэктиибэ буоллулар.

Ону тэҥэ улуус федерациятын бэрэссэдээтэлэ Дария Назарова чаҕылхай кыттааччыларга анал ааттары туттарда.

Эрчимнээх үҥкүү күрэҕэ биир тыынынан олус тэтимнээхтик, чаҕылхайдык буолан ааста.

Мэҥэ Хаҥалас улууһун дьаһалтатын пресс-сулууспата