УЛУУСТААҔЫ КУЛТУУРА ЭЙГЭТИН ҮЛЭҺИТТЭРИН АЛТЫННЬЫТААҔЫ СҮБЭ МУННЬАҔА

УЛУУСТААҔЫ КУЛТУУРА ЭЙГЭТИН ҮЛЭҺИТТЭРИН АЛТЫННЬЫТААҔЫ СҮБЭ МУННЬАҔА

 

Бүгүн, алтынньы 11 күнүгэр, Дмитрий Ходулов аатынан норуот айымньытын дьиэтигэр улууспут кынаттаах култууратын үлэһиттэрин алтынньы ыйдааҕы сүбэ мунньаҕа ыытылынна. Манна нэһилиэктэртэн култуура кииннэрин, бибилэтиэкэлэрин, түмэллэрин үлэһиттэрэ, оҕо ускуустубатын оскуолатын кэлэктиибэ, барыта 182 киһи кыттыыны ылла.

 

Быйылгы мунньах «Тыа сиригэр айар үлэ – норуоту түмэр сүдү күүс» диэн ааттанан тэрилиннэ. Аһаҕас кэпсэтиини улуустааҕы култуура уонна духуобунай сайдыы салалтатын салайааччытын солбуйааччы Александр Кулешов иилээн-саҕалаан ыытта.

 

Бүгүҥҥү сүбэ мунньахха СӨ култууратын уонна духуобунаһын миниистирэ Афанасий Ноев эҕэрдэ уонна сүбэ тылын ыыппытын иһиттилэр.

 

Пленарнай чааһыгар улуус баһылыгын социальнай уонна имиджевэй бэлиитикэҕэ солбуйааччы Альбина Григорьева кыттыыны ылла.

Култуура уонна духуобунай сайдыы салалтатын информационнай-методическай киинин салайааччыта Галия Сосина, өрөспүүбүлүкэтээҕи норуот айымньытын уонна социальнай технологияларын дьиэтин информационнай-методическай салаатын салайааччыта Анастасия Кутугутова, методиһа Сардаана Егорова, СӨ национальнай бибилэтиэкэтин научнай-методическай киинин методиһа Любовь Боярская, СӨ геокультурнай сайдыы институтун сүрүн методистара Инна Донская уонна Анжелика Бережнева тиэмэлэринэн иһитиннэриилэри оҥордулар.

 

Мунньах иккис чааһыгар 2025 сылга улуус култууратын салалтатын сыллааҕы былааныгар киллэриллэн, онно үп көрүллэн, олоххо киирэригэр олук буолуохтаах бырайыактары көрүү күрэҕэ буолла.

Уопсайа 18 бырайыак киирбититтэн 5 бастыҥ ааттанна.

Ол курдук, кыайыылаахтарынан Мэҥэ нэһилиэгин элбэх хайысхалаах култуура киинин кэлэктиибэ, Тараҕай нэһилиэгин Капиталина уонна Иван Бурнашевтар ааттарынан култуура дьиэтэ, Мэҥэ Хаҥаластааҕы муниципальнай кииннэммит бибилэтиэкэ ситимин Майатааҕы И.М.Брызгалова аатынан оҕо бибилэтиэкэтэ, Д.Ф.Ходулов аатынан норуот айымньытын дьиэтэ уонна Дьаҥхаады нэһилиэгин элбэх хайысхалаах култуура киинэ буоллулар.

Ону таһынан куонкурус кыайыылаахтарын ахсааннарын таһынан Баатара нэһилиэгин элбэх хайысхалаах култуура киинин бырайыагын дьүүллүүр сүбэ биһирээн туспа көрөн, үөрэтэн өйүөххэ наада диэн быһаардылар.

Салгыы быйылгы сылга улууспут култууратын эйгэтигэр үлэлэрин саҕалаан эрэр эдэр исписэлиистэри чиэстээтилэр. Улуустааҕы култуура уонна духуобунай сайдыы салалтатын салайааччытын солбуйааччы Александр Кулешов эдэр исписэлиистэргэ үлэлэригэр ситиһиилэри, баҕа санаа бастыҥын анаан туран өйдөбүнньүк бэлэхтэри туттарда.

 

Тэрээһин улууспут култууратын эйгэтигэр өр сылларга үлэлээбит бэтэрээннэрин “Көмүс күһүнү айхаллыах” эҕэрдэ кэнсиэрдэринэн түмүктэннэ.

Бу үөрүүлээх күҥҥэ өрөспүүбүлүкэтээҕи норуот айымньытын уонна социальнай технологияларын дьиэтин иһинэн 2024 сыллаахха саҥа айыллыбыт “СӨ уус-уран самодеятельноһын бэтэрээнэ” ааты улууспут култууратын сайдыытыгар сүҥкэн кылааттарын киллэрбит киэн туттар дьоммутугар Павел Павлович Егоровка, Анисия Даниловна Скрябина5а, Светлана Степановна Турчинаҕа өрөспүүбүлүкэтээҕи норуот айымньытын уонна социальнай технологияларын дьиэтин информационнай-методическай отделын салайааччыта Анастасия Кутугутова ытыс дохсун тыаһыгар доҕуһуоллатан туттарда.

 

Мэҥэ Хаҥалас улууһун дьаһалтатын пресс-сулууспата