УМАЙА ТУРАР ДЬИЭТТЭН КИҺИНИ БЫЫҺААТЫЛАР

УМАЙА ТУРАР ДЬИЭТТЭН КИҺИНИ БЫЫҺААТЫЛАР

Ааспыт нэдиэлэ өрөбүллэригэр полиция үлэһиттэрэ уоттан кырдьаҕас киһини быыһаатылар.
Бу туһунан Өрөспүүбүлүкэтээҕи Ыксаллаах быһыы-майгы министиэристибэтин иһинэн үлэлиир Мэҥэ Хаҥаластааҕы кэтиир уонна сэрэтэр үлэни ыытар салаа лейтенана Евгений Верховцев сырдатта.

Атырдьах ыйын 13 күнүгэр түүн биир чаас саҕана Суолга куттала суох буолуу Судаарыстыбыннай инспекция лейтенаннара Роберт Егоров уонна Ян Тоскин Аллараа Бэстээх бөһүөлэгин устун ботурууллуу сылдьан, ыраахтан хатан тыаһы истэн, түргэн үлүгэрдик
умайан эрэр чааһынай дьиэҕэ тиийбиттэр.

Эдэр дьон иһирдьэттэн көмөҕө ыҥырар хаһыыны истээт, өр толкуйдуу барбакка, хатыылаах үрдүк олбуору ойон киирэннэр, умайа турар дьиэттэн кырдьаҕас киһини быыһаабыттар. Дьуһуурунай чааска эрийэннэр баһаар буола турарын биллэрбиттэр, сотору кэминэн баһаарынай сулууспа кэлэн уоту утары үлэтин саҕалаабыт. Бу дьиэҕэ баһаартан сэрэтэр тэрил АДПИ турбатаҕа билиннэ

Киһи уйана-хатана маннык мүнүүтэлэргэ биллэр. Бэйэлэрин харыстаммакка, уот ортотунан киирэн, киһи үрүҥ тыынын быыһаабыт үтүө санаалаах уолаттары оройуоннааҕы Ыксаллаах быһыы-майгы салалтата үрдүк наҕараадаҕа түһэрэргэ докумуоннары бэлэмниэҕэ.

Ытыктабыллаах биир дойдулаахтарбыт!

Дьиэҕитин-уоккутун, чугас дьоҥҥутун баһаартан харыстааҥҥыт АДПИ-та туруорунаргытыгар ыҥырабыт.

АДПИ - баһаар турбутун тута сэрэтэр автономнай тэрил.
Кыра да буруо сытыгар утуйа сытар киһини уһугуннарар гына улаханнык тыаһаан биллэрэр, иэдээн тахсарыттан сэрэтэр аналлаах.
Сыаната быһа холоон 500-600 солкуобай, анал маҕаһыыннарга атыыланар.

Мэҥэ Хаҥалас улууһун дьаһалтатын пресс-сулууспата