ҮӨРЭХ ТЭРИЛТЭЛЭРИН САЛАЙААЧЧЫЛАРЫН МУННЬАҔА

ҮӨРЭХ ТЭРИЛТЭЛЭРИН САЛАЙААЧЧЫЛАРЫН МУННЬАҔА

Бүгүн, бэс ыйын 5 күнүгэр, Ф.Г. Охлопков аатынан Майа орто оскуолатын аактабай саалатыгар улууспут үөрэх тэрилтэлэрин салайааччыларыгар үөрэх дьылын барыллаан түмүгүнэн сүбэ мунньах ыытылынна.



Улуус баһылыгын социальнай уонна имиджевэй бэлиитикэҕэ солбуйааччы Альбина Григорьева нуучча литературатыгар сүүс баалы ылары ситиспит үөрэнээччилэри, кинилэри дьарыктаабыт учууталлары бу дьоһун ситиһиилэринэн эҕэрдэлээн туран иккис сылын ыытыллар «IT актив» күрэх бастыҥнарын бэлиэтээтэ.

Сыл түмүгүнэн АИС «Сетевой город», «Образование», ИКОП «Сферум», ФГИС «Моя школа» платформалары көдьүүстээхтик туһаммыт, толорбут оскуолалартан

Аллараа Бэстээх иккис нүөмэрдээх оскуолатын алын сүһүөҕун учуутала Розалия Широких «Көхтөөх учуутал» номинация муҥутуур кыайыылааҕынан ааттанан Өлүөнэ очуостарыгар путевканан наҕараадаланна,

«Көхтөөх оскуола» номинация кыайыылааҕынан Павел Старостин дириэктэрдээх И.И. Платонов аатынан Наахара орто оскуолата буолла,

«Көхтөөх оҕо уһуйаана» номинацияҕа Чүүйэтээҕи «Чэчир» оҕо уһуйаана ааттанна, сэбиэдиссэй Раиса Атласова.

Мунньаҕы үөрэх салалтатын салайааччыта Гаврил Толстяков иилээн-саҕалаан ыытта. Ааспыт үөрэх дьылыгар турбут былааны толорууга үөрэх тэрилтэлэрин сыаналыыр рейтинг ыам ыйдааҕы түмүгүн билиһиннэрдэ.

Үөрэҕирии салалтатын салайааччытын солбуйааччы Ирина Плотникова эһиилги үөрэх дьылыгар киирэр саҥа сүүрээннэри, былааннары, туохха туһаайыллалларын, кадр тиийбэт кыһалҕатын быһаарыыны кэпсээтэ.

Ону тэҥэ, от ыйыгар биһиги улууска ыытыллыахтаах өрөспүүбүлүкэтээҕи педагогическай дьаарбаҥка тэрээһинин тула кэпсэттилэр.

Салгыы уһуйаан сэбиэдиссэйдэрэ уонна оскуола дириэктэрдэрэ диэн арахсан турар боппуруостар тура дьүүллэстилэр.

Мэҥэ Хаҥалас улууһун дьаһалтатын пресс-сулууспата