ҮӨРЭХТЭЭҺИН ТӨРҮТТЭММИТЭ 150 СЫЛЫН КӨРСӨ

ҮӨРЭХТЭЭҺИН ТӨРҮТТЭММИТЭ 150 СЫЛЫН КӨРСӨ

Олунньу 7 күнүгэр Т.Пинегин аатынан «Парус» спорт уораҕайыгар Арассыыйаҕа Уһуйааччы уонна Аҕа сүбэһит сылыгар ыытыллыбыт үлэни түмүктүүр, улууспутугар Үөрэхтээһин төрүттэммитэ 150 сылын көрсөр бэлиэ тэрээһин киэҥ далааһыннаахтык, үрдүк таһымҥа ыытылынна.

Кэлбит ыалдьыттары аантан көрсүү, өйдөбүнньүк хаартыскаҕа түһэр анал сир, үөрэҕирии тэрилтэлэрин үлэлэрин сырдатар араас интэриэһинэй макеттаах быыстапка, быһа холбонуулаах улахан экран, уот-күөс бу барыта тэрээһини ситэрэн-хоторон киэргэттэ.

Тэрээһин үөрүүлээх арыллыытыгар ааспыт сылга араас таһымнаах күрэхтэргэ улууспут чиэһин ситиһиилээхтик көмүскээбит, кыайыы үрдүк чыпчаалын дабайбыт учууталлар, уһуйааччылар,

ону тэҥэ үйэ сыл тухары үөрэҕирии эйгэтигэр үлэлээбит, уопсайа 43 чилиэннээх, 1100 сыл ыстаастаах Платоновтар педагогическай династияларын бэрэстэбиитэллэрэ кыһыл доруосканан хааман киирэн бочуоттаах миэстэлэригэр олордулар.

Улуус баһылыга Дмитрий Тихонов, улуустааҕы үөрэҕирии салалтатын салайааччыта Гаврил Толстяков,

СӨ Ил Түмэн Судаарыстыбаннай Мунньаҕын Билим уонна үөрэҕирии сис кэмитиэтин бэрэссэдээтэлэ Антонина Григорьева,

С.Н.Донской аатынан Үөрэх сайдыытын уонна квалификацияны үрдэтии үнүстүтүүтүн дириэктэрэ Ньургун Павлов,

улуустааҕы үөрэҕирии эйгэтин үлэһиттэрин идэлээх сойууһун бэрэссэдээтэлэ Иннокентий Скрябин тыл этэн эҕэрдэлээтилэр, дьоһун наҕараадалары туттардылар.

Тэрээһин иккис чааһа улууспутугар Үөрэхтээһин тэриллибитэ 150 сылыгар ананна.

150 сыл анараа өттүгэр Илин Хаҥалас улууһун Ороссолуода сиригэр-уотугар аан маҥнайгынан

"Сайдыы суола - үөрэххэ, үөрэх төрдө - оскуолаҕа!" диэн санаанан салайтаран, үйэлэр уларыйыыларын өтө көрбүт,

25 сыл устата Илин Хаҥалас улууһугар кулубалаабыт бочуоттаах инородец, меценат, биир дойдулаахпыт Герасим Иванович Соловьев улахан үктэли уурбута, Мэҥэ Хаҥалас улууһун үөрэхтээһинин бүгүҥҥү күҥҥэ сайдыытын сахпыта.

Маннык үөрүүлээх күҥҥэ оскуолалар, уһуйааннар салайааччыларын толорууларыгар улууска үөрэхтээһин тиһигэ тэриллибитэ 150 сыллаах бэлиэ түгэнин уруйдаан-айхаллаан көрсөргө анаммыт саҥа ырыа сүрэхтэннэ.

Ырыа тылын педагогическай үлэ бэтэрээнэ, РФ үөрэҕириитин туйгуна, "Саха-Азия оҕолоро" пуонда стипендиата Лидия Андросова,

матыыбын СӨ култууратын туйгуна Прокопий Федоров суруйдулар.

Тэрээһин хаамыытынан өрөгөйдөөх сыл бэлиэтэ бигэргэннэ.

Эмбилиэмэ ааптардарынан Аллараа Бэстээх иккис нүөмэрдээх оскуолатын «Кэрэли» эбии үөрэхтээһин киинин педагоктара Ольга Зедгенидзева, Нарыйа Прохорова буолаллар.

Саҥа сыл бэлиэтигэр табыллыы, дьолу, эрэли, муударай буолууну бэлиэтиир өҥнөр дьүөрэлэстилэр. Үөрэҕи-билиини ылар көҥүл кыах бэлиэтинэн аһаҕас кинигэ, саҥа билиини, арыйыыны көрдөрөр ыраас илиис, сырдыгы-ырааһы, күүһү-уоҕу, эрчими эбэр күн бэлиэтэ киирдилэр.

Илин Хаҥалас улууһугар маҥнайгы оскуола тэриллиэҕиттэн үгүс кэм өрүс сүүрүгүнүү устан ааста, үөрэҕириигэ элбэх уларыйыылар буоллулар. Ол эрээри учуутал, иитээччи, уһуйааччы оруола уларыйбат.

150 сыл ааһыаҕыттан биһиги кэммит учууталлара улуус үөрэҕин историятын салгыыллар, суол-иис хааллараллар.

Үлэлииллэрин тухары уостары, салҕары билбэт, күннэтэ үрдүк билиигэ-көрүүгэ тардыһар учууталга уонна иитээччигэ өрүү сүгүрүйэбит, ытыктыыбыт, чиэстиибит!

Мэҥэ Хаҥалас улууһун дьаһалтатын пресс-сулууспата