В.П. ЛАРИОНОВ ААТЫНАН «ДОЙДУ СИТИМЭ» ТҮМСҮҮ ҮТҮӨ ТҮҺҮЛГЭТЭ ТЭРИЛИННЭ

В.П. ЛАРИОНОВ ААТЫНАН «ДОЙДУ СИТИМЭ» ТҮМСҮҮ ҮТҮӨ ТҮҺҮЛГЭТЭ ТЭРИЛИННЭ

Бүгүн, олунньу 8 күнүгэр, Дьокуускай куоракка олорор, үлэлиир биир дойдулаахтарбыт, В.П. Ларионов аатынан "Дойду ситимэ" уопсастыбаннай холбоһук улууспут кэскилин түстэһэр, 100 сыллаах үбүлүөйүн көрсөргө былааннары торумнаһар пуорум тэрийэн ыытта.

Үтүө түһүлгэҕэ улууспут салалтата, дьокутааттарбыт, нэһилиэк баһылыктара, тэрилтэлэр, салалталар салайааччылара, араас сылларга улууспутун салайбыт тумус туттар, сатабыллаах салайааччыларбыт, биир дойдулаахтарбыт түмүстүлэр.

Пуорум чэрчитинэн стратегическай, панельнай сессиялар ыытылыннылар. Тапталлаах дойдубут, Мэҥэ Хаҥаласпыт салгыы сайдарыгар, дьоммут-сэргэбит олоҕо бигэ туруктаах буоларыгар тумус туттар, ытыктыыр дьоммут сүбэлэрин-амаларын, чаҕылхай, бастыҥ ыччаттарбыт кэскиллээх этиилэрин иһиттибит. Ону тэҥэ "Дойду ситимэ" уопсастыбаннай холбоһук инники кэскилин тула үлэни-хамнаһы, үүммүт уонна кэлэр сылларга былааннарын торумнаатылар.

Түмүккэ пуорум пленарнай чааһын СӨ Идэҕэ урутаан бэлэмниир киин дириэктэрэ Владислав Хабаров иилээн ыытта. Манна улуус баһылыга Дмитрий Тихонов, оройуон дьокутааттарын Сэбиэтин бэрэссэдээтэлэ Иннокентий Андросов, Ил Түмэн Судаарыстыбаннай мунньах Сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин, СӨ Үп миниистирин солбуйааччы Николай Старостин, СӨ футбол спортивнай оскуолатын дириэктэрэ, "Дойду ситимэ" уопсастыбаннай холбоһук бэрэссэдээтэлэ Николай Цыпандин мустубут бар дьону кытта улууспут сайдыытын, инники кэскилин тула атах тэпсэн олорон кэпсэттилэр.

Төрөөбүт, олорор улууспут чэчирии сайдарын, инники кэскилин туһугар куруук маннык түмсүүлээх, инникигэ эрэллээх буолуоҕуҥ!

Мэҥэ Хаҥалас улууһун дьаһалтатын пресс-сулууспата