Хоһуун дьонноох Ходоро нэһилиэгэр Алтаннар ыалдьыттаатылар

Олунньу 19 күнүгэр эстафета былааҕын күөрэччи тутан Алтан нэһилиэгин олохтоохторо Ходороҕо ыалдьыттаатылар.

Чүүйэлэр оһуохайдара эр дьон оһуохайынан саҕаланан төрүт түһүлгэни төрүттээн, барыта 33 эр киһи оһуохайы оройуттан туттулар. Эдэр кэскиллээх оһуохайы таһаарааччылар Давид Романов уонна Николай Игнатьев бүгүҥҥү күн Мэҥэлии оһуохай кэскиллээҕин өссө төгүл дакаастаатылар. Түмүккэ Маргарита Нестерова оһуохайыгар 48 кэрэ аҥар кыттыһан, барыта Ходоро түһүлгэтигэр 81 кыттааччы хабылынна. Чүүйэлэр оһуохайдара 4,12 баалынан сыаналанна. Кэскиллээх оһуохайы таһаарааччылар Давид Романов уонна Николай Игнатьев лауреат үрдүк ааты ылан, нэһилиэктэрин ааттаттылар.

Уус уран оҥоһук быыстапкатыгар барыта 39 кыттааччы, 279 оҥоһугу туруордулар. Балаһыанньанан ирдэнэр үлэ сүрүн өттүгэр үлэлэр бааллар, аны сатабылы сайыннаран үрдүкү маастарыстыба таһымын баһылыырга дьүүллүүр сүбэ баҕа санаатын эттэ. Уран тарбахтаахтар көрүүлэрин лауреаттарынан Ньургуйаана Дмитриева, Александра Иванова, Сыахай түмсүү, Февронья Нестерова, Марфа Скрябина, Валентина Тимофеева буоллулар. Дипломант ааттара Ирина Аргуноваҕа, Александра Морозоваҕа, Екатерина Федороваҕа, "Сиэл" түмсүүгэ, "Кырадаһын абылаҥа" куруһуокка, "Туойдаана" түмсүүгэ, Елена Федороваҕа, Дмитрий Скрябиҥҥа иҥэрилиннилэр. Чүүйэлэр быыстапкалара 4,05 баалынан сыаналанна.

Спортка доҕордуу көрсүһүүгэ, элбэх көрүҥҥэ кыайыылааҕынан тахсаннар Чүүйэлэр 25:10 очукуолаах өрөгөй үөрүүтүн биллилэр.

Алтан нэһилиэгин уус-уран самодеятельноһын кэнсиэригэр барыта 56 кыттааччы кытынна. Кэнсиэр ыйыллыбыт нүөмэрдэртэн таҥыллан туруоруллубут, быйыл ордук сыанаҕа кэтэр таҥас-сап тупсубутун дьүүллүүр сүбэ биһирээтэ.

Ол эрэн, тиһиктээх үлэ бөлөхтөрү кытары ыытыллыытын сайыннарыыны уонна режиссер көрүүтүн киллэрэн кэнсиэри биир ситимнээх гына туруорууга күүстээх үлэ наадатын ыйдылар.

Түмүккэ, лауреат үрдүк аата хор кэлэктиибигэр "Тыыннаахтар умнубат сыллара" ырыатын иһин, уус-уран ааҕыы кэлэктиибигэр, "Саһарҕа" дьахталлар ансаамбылларыгар уонна үҥкүү бөлөҕөр "Дьиэрэҥкэй" үҥкүүтүн иһин иҥэрилиннэ.

Дипломант аатын ылан Валентина Петрова, үҥкүү бөлөҕө "Синий платочек" үҥкүүтүнэн, Михаил Иванов уонна Татьяна Очегасова сольнай ырыалара, "Эр киһини атыылыыбын" сценка уонна ыччат блогун туруоруута биһирэннилэр.

Алтан нэһилиэгин уус-уран самодеятельноһын кэнсиэрин дьүүллүүр сүбэ 4,03 баалынан сыаналаата.

Бу курдук, улууспут дьонун сомоҕолуур модун күүстээх 68-с В.К. Степанов аатын сугэр Култуура уонна спорт эстэпиэтэтэ иккис бөлөххө тыҥааһыннаахтык бара турар.

Култуура уонна духуобунай сайдыы салалтатын Информационнай методическай киинин салайааччыта Галия Сосина