Хотун Төҥүлү нэһилиэгэр Анна Моторовна.

Хотун Төҥүлү нэһилиэгэр Анна Моторовна, Алгыс Николаевич Харитоновтар дьиэ кэргэн оранжерея дьиэтин арыйар үөрүүлээх тэрээһиннэрэ буолла.

Хаһаайыттар Саха Өрөспүүбүлүкэтин тыа хаһаайыстыбатын министиэристибэтин икки мөлүйүөн солкуобайдаах граны кыайан, 2020 сылтан үлэлэһэн, аныгы олох ирдэбилинэн төгүрүк сыл үлэлиир 9 да 6 миэтэрэ иэннээх оранжерея дьиэтин олоххо киллэрдилэр. Үөрүүлээх тэрээһиҥҥэ улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, Төҥүлү нэһилиэгин баһылыга Петр Эверстов, улуустааҕы тыа хаһаайыстыбатын исписэлииһэ Ньургуйаана Семенова, биир идэлээхтэрэ, доҕотторо-атастара, олохтоохтор эҕэрдэлээтилэр.

Өр сылларга үүнэйинэн дьарыктанар, сатабыллаах далбар хотун Анна Моторовна 2006 сыллаахтан саҕалаан оҕуруот аһын үүннэриитинэн күүскэ ылсан үлэлээбит. Бастакы сылларыгар помидор олордон 350 киилэҕэ диэри аһын хомуйара. 2009 сылтан нэһилиэнньэҕэ анаан саас хаппыыста, оҕурсу, помидор уонна да атын оҕоруот аһын арассаадатын атыылыыр.

2019 сыллаахха "Агростартап" гранын ылан, уу таһар массыына ылбыттар, тэпилииссэ туттубуттар. Ол кэннэ клубника олордон саҕалаабыттар.

Сылга 800 клубень

олордуллубутуттан 100-тэн тахса киилэ клубника хомуйара.

Үһүс сылын Төҥүлү дьаһалтатын кытта үлэлэһэн, искибиэргэ сибэкки олордор киэргэтиинэн дьарыктанар.

Сыл аайы күһүҥҥү "Продовольствие" өрөспүүбүлүкэтээҕи дьаарбанкаҕа көхтөөх кыттыыны ылар.

Билиҥҥи кэмҥэ көһөрүллэн ылар малина, моонньоҕон, боярышник, яблоня үүннэриитинэн, ыҥырыа иитиитинэн дьарыктанар.

Бу барыта улахан сыраттан-сылбаттан, бэриниилээх үлэттэн тахсар ситиһии. Харитоновтар дьиэ кэргэҥҥэ чэгиэн буолууну, инникитин даҕаны таһаарыылаах үлэни, ситиһиилэри, быйаҥнаах дьылы, өссө кэҥээн, сайдан иһэллэригэр баҕарабыт!

Мэҥэ Хаҥалас улууһун дьаһалтатын пресс-сулууспата