ЫЧЧАТТАРБЫТ ЭРЭГИЙИЭННЭЭҔИ ДЬЫАЛАБЫАЙ ООННЬУУГА

Кулун тутар 12-13 күннэригэр Чурапчы улууһугар дойдубут сайдыытыгар ыччат ураты көрүүтүн арыйар Старт эрэгийиэннээҕи дьыалабыай оонньуу ыытылынна.

Манна уопсайа 49 илин эҥэр улуустарын көхтөөх ыччаттара, лиидэрдэрэ сэттэ хамаандаҕа арахсан кыттыыны ыллылар, бырайыак суруйан көмүскээтилэр.

Арассыыйаҕа Дьиэ кэргэн сылынан биһиги улуустан олоххо көхтөөх көрүүлээх ыал ыччаттарбыт кыттыыны ыллылар, ол курдук Балыктаахтан бааһынай фермерскай хаһаайыстыба салайааччыта Ньургун Габышев кэргэнинээн Яна Габышевалыын - Балыктаах орто оскуолатын биология уонна химия учуутала, Упрмелиоводхоз өрүс уҥуордааҕы филиалын ууну туттуу салаатын начаалынньыга Леонид Борисов кэргэнинээн Александра Борисовалыын - улуус дьаһалтатын экэниэмикэҕэ салалтатын экэниэмикэҕэ салаатын салайааччыта.

Ону тэҥэ бастыҥ үлэһит ыччаттар Балыктаахтан бааһынай фермерскай хаһаайыстыбатын салайааччыта Дьулустан Говоров, И.Г. Тимофеев аатынан Майатааҕы лицей иитии үлэҕэ дириэктэр сүбэһитэ Алена Рязанская, И.Г. Тимофеев аатынан Майатааҕы лицей тэрийээччи педагога Дмитрий Черяев оонньууга кытыннылар.

Хамаандалар пластик иһиттэри уонна Чурапчы туойун булкуйан тутуу матырыйаалларын оҥоруу, түргэнник ситэр бройлеры иитиинэн дьарыктаныы, нэһилиэнньэҕэ тиэрдэн биэриигэ дроннары туһаныы, улахан техникэлэри өрөмүөннүүр сервиһи арыйыы, байыаннай дьайыыттан кэлбиттэргэ реабилитациялыыр киини тэрийии, бэйэбитигэр үүнэр отоннортон утахтары оҥоруу, эко-агротуризмы тэрийии курдук бырайыактары билиһиннэрдилэр.

Икки күннээх дьыалабыай оонньуу түмүгүнэн

I миэстэ Яна Габышева, Дьулустан Говоров (хапытаан) оонньообут Маҥаннар хамаандалара,

II миэстэ Леонид Борисов оонньообут От күөхтэр хамаанда,

III миэстэ Дмитрий Чиряев кыттыбыт Өй түмсүү хамаандата.

Ону таһынан биэс анал аат олохтоммутуттан иккитэ биһиги улууспут уолаттарыгар туттарылынна. Леонид Борисов Бастыҥ оонньооччу, Дмитрий Чиряев Креативнай лиидэр анал ааттары сүктүлэр.

Чурапчы улууһун баһылыга Степан Саргыдаев бу оонньууга кыттыбыт ыччаттартан бастыҥнары өрөспүүбүлүкэ кадровай резервнэй пуондатыгар ылыахтара диэн иһитиннэрдэ.

Мэҥэ Хаҥалас улууһун дьаһалтатын пресс-сулууспата