ЫҺЫАХ СҮРҮН БИРИИҺЭ ХАҺААЙЫНЫН БУЛЛА

Баһылай Манчаары аатынан стадиоҥҥа Ыһыахпыт түмүктүүр түһүмэҕэ - дьон-сэргэ өр күүппүт сүүйүүлээх түһүлгэтэ ыытылынна.

Манна үгүс күннээҕи олоххо, тыа хаһаайыстыбатыгар тыын суолталаах дьоһун бириистэр оонньоннулар. Ол курдук, улууспут араас нэһилиэктэриттэн сылдьар дьоммут робот-пылесос, телевизор, холодильник, таҥас сууйар массыына, бассейн, мотокоса, скоростной косилка, грабли-ворошилки, бензогенератор, сварочнай аппарат, булт саата, пресс-подборщик итиэннэ ньирэйгэ, убаһаҕа туоһу суруктар, онтон да атын сыаналаах бириистэргэ, тыа дьоно сиргэ уокка сылдьарга, үлэлииргэ-хамсыырга мантан сайын олус туһалаах сэпкэ-сэбиргэлгэ тиксэн үөрүүлэрэ үгүс. Сүүйүүлээх түһүлгэни Васианна Птицына салайааччылаах Благодеяние территориальнай, уопсастыбыннай бэйэни салайыныы өйөбүл пуондата тэрийдэ, тимир ууһа Андрей Каратаев саха быһаҕын Петр уонна Валентина Егоровтар, Туойаана мастарыскыай аатыттан туой иһит наборун; Саха НКИХ генеральнай дириэктэрэ Олег Марков миэбэл; Арассыйатааҕы Наука Академиятын генеральнай дириэктэрин солбуйааччы Тихон Скрябин ньирэй бириистэри туруоран өйөөтүлэр.

Бу киэһэни Сахабыт сирин эстрадатын чаҕылхай сулустара киэргэттилэр, биир дойдулаахтарбыт Степан Порядин уонна Дмитрий Баишев иилээн-саҕалаан ыыттылар.

Сүрүн бириис хаһаайынынан Майа сэлиэнньэтин олохтооҕо Наталья Попова буолла, итиитик-истиҥник эҕэрдэлиибит!

Улууспут олохтоохторугар, көхтөөхтүк кыттыбыт дьоммутугар-сэргэбитигэр махталбытын биллэрэбит. Мантан киирбит үп анал байыаннай дьайыыга дойдубутун хорсуннук көмүскүү сылдьар биир дойдулаахтарбытыгар өйөбүл буолан ананыаҕа.

Мэҥэ Хаҥалас улууһун дьаһалтатын пресс-сулууспата